في أيام الدراسة والمذاكرة أحيانا كان الواحد يقعد يدعي ربنا ويقول (يارب بس اجيب درجة النجاح نفسي اعدي من المادة دي ، حتى لو بس بدرجة النجاح).
احنا داخل الدنيا في امتحان . وكلنا بالتأكيد نفسنا ننجح حتى لو هنجيب فقط درجة النجاح ، المهم ننجح .
لكن يا ترى درجة النجاح للكل هتبقى واحدة ، يعني اللي كان امتحانه صعب في الدنيا زي اللي كان امتحانه سهل ؟
بالتأكيد اللي كان امتحانه صعب درجة النجاح عنده مش زي اللي كان امتحانه سهل .
اللي مر في حياته بظروف صعبة ، رزقه كان قليل أو كان مريض أو كانت زوجته سيئة الخُلق أو أولاد تعبينه وفي نفس الوقت كان صابر على حاله ومحتسب وراضي ومش متذمر ، أكيد أكيد درجة النجاح عنده قليله يعني مثلا لو جاب 3 من 10 يعتبر ناجح .
اما إذا كانت حياته ميسره مادياً ومعافى في صحته ، وربنا كرمه بزوجة كويسة ومبارك له في اولاده ، أكيد درجة النجاح عنده مرتفعة ولازم يجيب 8 من 10 عشان يعتبر ناجح .
أنا ليه بقول الكلام ده ؟
عشان احنا كاصحاب شركات الحاق عمالة الحمد لله رب العالمين ، ربنا أكرمنا أن يكون عندنا شركات وموظفين وعندنا بيت ملك وعربية وزوجه وأولاد ، فضل ربنا علينا كبير .
لكن في نفس الوقت نكون مدركين ان درجة النجاح عندنا مرتفعة يعني عشان تعدي محتاج تجيب 8 من 10 .
وده يخلينا لازم نكون صادقين وامناء اكتر ، ونعمل خير اكثر ، ونساعد ونسهل علي الناس اكتر .
وكل ما نفسك تحاول تبعدك . اقف امام مرايتك وذكر نفسك (ان درجة النجاح عندك اعلي من درجة النجاح عند غيرك) فارجع بسرعة واجتهد عشان تنجح في اهم واصعب امتحان .
نسأل الله العظيم 🤲 ان يجعلنا جميعاً ممن يصلون الي درجة النجاح .
اخيراً ما سيرنا في قطاع الحاق العمالة لنحيا !
ولكن سيرنا فيه ليحيا.
أ/ وائل أبوعالية - المدير العام لشركة أبوعالية للتوظيف الخارجي & شريك مؤسس منصة لينك أوت.
