في أحيان كثيرة تتصل على حد ولا يقوم بالرد عليك !!!
بعدها بيكون هناك اكثر من ردت فعل .
في ناس بتاخد الموضوع على كرامتها أنا اتصلت عليك يبقى لازم ترد ، وإلا مش هتصل عليك تاني ، أنت شايف نفسك علينا ليه ؟ يا عم اللي عطاك يعطينا ، أنت نسيت أنت كنت ايه !! الاخ اصل عامل فيها عبده المهم .
وخذ عندك حاجات من هذا القبيل .
مع أن هذا مخالف للتعاليم الربانية ، ربنا بيقول ( وإن قيل لكم ارجعوا فارجعوا هو أزكى لكم )
يعني لو أنت رحت لغاية باب بيته وضربت عليه الجرس او خبطت عليه وانت سامع صوت من ورا الباب !! وقالك هو او حد من أهل بيته ارجع ترجع ، ترجع وانت مش زعلان ولا شايل في خاطرك منه ، مش تفضح الدنيا وتقول أنا أروح لغاية باب البيت اضرب عليه وانا سامع صوته ويتنكر مني !! ويقولولي ارجع لو سمحت . والله العظيم ما اعرفه تاني . ولازم يجي يعتذر .
مش ده اللي بيحصل يا سادة !!!
القلوب الصافية النقية هي اللي بتعذر لانها تعلم معني قول الله هو ازكي لكم ، اما القلوب اللي مليانة حقد و كره و كِبر هي اللي بتزعل وتشيل . وازاي نسي نفسه ولا ايه ، مش عارف انا مين !!
متى نلتمس الأعذار لبعض ، ليس في الرد على التليفون فقط ، وإنما في كل معاملاتنا .
ضغوط الحياة هذه الأيام كبيرة وتقلباتها سريعة خاصة في مهنة التوظيف وإلحاق العمالة . تبقى قاعد في أمان الله يدخل عليك عميل يرفعلك الضغط او يتصل عليك صاحب عمل مش مستوعب إن كل حاجة بتاخد وقت !! يعكنن عليك يومك ، وكأنك المفروض تشيل العامل بإيدك تحطه الناحية التانية .
حياتنا بقت صعبة والشغلانة بتاعتنا أصلاً صعبه ، لأن كل تعاملاتها مع البشر فقط .
وهذا يتطلب منا أن نلتمس الأعذار لبعض لتبقى علاقة الود والمحبة والزمالة قائمة.
أخيرا ما سيرنا في قطاع الحاق العمالة لنحيا !
ولكن سيرنا فيه ليحيا.
أ/ وائل أبوعالية - المدير العام لشركة أبوعالية للتوظيف الخارجي & شريك مؤسس منصة لينك أوت.
